A schwäbischs Gschichdle iber dr’ Beidelschbecher Kirbejohrgang `71

Verfasserinnen: Andrea Weber (geb. Weidenbacher) und Andrea Lenz
In liebevoller und mühsahmer Schreibarbeit digitalisiert von Tanja Kimmich.

Em Frihjohr 1990 hemmer os s'erschde mol droffa ond zwar em Goispeter, d’ Wirtschaft bei dr’ Beidelschbecher Halle. S'wared an Haufa do, abber zom Schluss wars blos no d’ Hälfde.

Do semmer dann au von oserm schpädera Vörschdand, Sandra ond Frieder begriasd worda. Dobei isch os dr' Bedrag gnannd worda, den jeder von os ufzombrenga hot, wenner bei dr' Kirbe dobei sei will. Mr glaubt’s kaum, Fuffzich schwerverdienende Marg ond des fer en Schwob. Schbäder isch dann no d’ Rätscha mit virzich Marg dozuakomma. Nochdem des beschprocha war henn se no ebbes iberd Kloidong verzehlt, dann war dr Obend gloffa.


Bei de nägschde Treffa semmr moischdenz en oserm "Schdammlokal“ em Veschbrschtible vom Klaus Ruppert gwä. Do hemmer dann iber elles des mit em Johrgang zdond hott gschwätzt, so au ibern Frihjohrsmarkt. Mer hen iberlegt, was mr an oserm Schtand verkaufa kennat, was au ebbes eibrengt. Letschdendlich hemmer os dann fr Kuacha, Dorda, Kaffe, Säft ond Warschteiner endschieda. Ond nadirlich fer oser ofafrischs Backhausbrot, des se os faschd aus de Heed grissa hen. Abber elles wär nex gworda ohne dui fleißig Midhilf vom Hoizer Oba Wahl, de Toigmacher Mudder Dippon, Mudder Lenz ond Mudder Staib), dui gleichzeidig Eischiaßmoischdere war, sowie de Eischiaßhelfer Liesel Deiss ond d’ Lina Hirsch.

Wo dr Märkt vorbei gwä isch hemmer os efders droffa, om ebbes bsonders z'beschbrecha, wia zom Beischbiel iber osre Klamodda. Noch längerer Raufzeit hemmer os fr en schena roda Schtoff mit Blümle entschieda. Aus dem Schdoff hot d’ Mudder Büche de Mädle Reg ond grosse Diacher, de Buaba gloine Diacher gnähd. D' Buaba sen ausserdem noch Esslinga gfahra ond hen sich schwarze Kniabondhosa kauft, ausserdem hen se sich dia rode Weschda von de 70'er ausglesd.

En derra Drachd hemmer dann ab Ende Auguschd elte Feschdla en dr Omgebong bsuachd:
01.09.1990: Keltereihogatse               
02.09.1990: Schnoiter Kirbe                 
08.09.1990: Enderschbecher Weifescht      
14.09.1990: Schnoiter Weifescht
15.09.1990: Schtettener Weifescht
17.09.1990: Schnoiter Weifescht
22.09.1990: Schtrempfelbecher Kelderfescht
23.09.1990: Schtrempfelbecher Kelderfescht
30.09.1990: Daimlerschtroßafescht        
30.09.1990: Beidelschbecher Feierwehrhogatse


Ond dann wars endlich soweit, d´letschde zwoi Wocha vor dr Beidelschbächer Kirbe en abrocha. Am Samschdich, dr 29.09.1990, hen d´Buaba d´Uffbau uff osern Ahänger baut. Am Daischdich, dr 02.10.1990, semmer dann zom erschda Mol mit oserm Ahänger gfahra, der voma „riesa“ Bulldog zoga worda isch. Denn hemmer von dr Firma Hägele in Schorndorf fr 26 Fahrschdonda omsonschd kriagt, wemmer Werbong machet, was ons bei dem Agebot ned schwergfalla isch. An dem Obend semmer also sérschde Mol mit onsrem Waga gfahra- s´war scho a sau guade Stemmong- die sich bei elle uf jedra Fahrt gschdeigert hot. Außer bei oserm Schofför Frank, der isch emmer Zickiger gworda. An dem Obend hot no des Saufgelage beim Frieder ufghert, wo mer no mit de 70ér zammaghockt sen.Mr henn nix bessers gwisst, als „Em Pfarrer hense d´Mütz klaut“ zom schpiela, nadierlich hemmer au die Wiedervereinigung en dr Glotze agugt. Dr. Joachim hot scho einige Zviel ket ond hots Spiel nemme blickt. Er hot emmer statt: „Em Pfarrer hense d´Mütz klaut“ „Em Parrer henses Mit klaud“ gsagt. So om halb Faife ischs no em Zemmer emmer leerer gworda ond zom Schluss wared blos no d Úte, Jo, Frank, Baunty, Andrea W., Thea, Hoga ond dr seit om halb Zwoi schlofende Gaschdgeber Frieder do. An de nächschde Obend semmer en oserm – seit Mittwoch gschigda Waga-en d´Ortschafda romgfahra ond hen ons en elle megliche Wirtschafda romtrieba. Do hemmer no onsre Liader gsonga; ond d´Wirt hen os, dass mr uffhairad, liaber ebbes zom Drenga gebba – mol ebbes guats- mol ebbes weniger guats. D´grenende Abluss von oserm Wagafahra war no des Gullaschfeschd en dr Conny Ihrm Wengertheisle am 08.10.1990. Dia oinzige dia durchkhalda hen, wared: Thilo, Baunty, Jo, Conny, Ute, Andrea L, Frank, Joachim und Andrea W.. Als mr no elle schiergar ens 11 Uhr Loch gfalla sen, hen sich dr Jo, dr Frank ond dr Thilo uff dr Weg gmacht, dr Waga wegzombrenga. Do dobei hen se en kloina Omweg zom Thilo gmacht ond gschwend a sauguade Gullaschsupp kocht. Zutat: Bixa-Schengawurschd, Zwiebla, Pepperonie usw......

Wirtschafrda en denne mr werend em Wagafahra wared, ond was mir griagt hen:

-Lewa (Beidelschbach)                           a bar Flascha Wei ond en Wurschdsalat

-Lenz (Beidelschbach)                            An Wei ond a Vesper

-Anger (Schnoit)                                    An Weisswei

-Trollinger (Grohebbach)                        An nuia Wei

-Baesa (Schnoit)                                   Wei

-Gretle (Strempfelbach)                         An scheißlicha Rotwei

-Sorgabrecher (Schdrempfelbach)          Hemmer elles selber zahla dirfa

-Muz (Endersbach)                                Subber Wei, soviel mer wella hen

 

Am Daischdich dr 09.10.1990 wollda mr, wias Tradizio isch, beim Lenza Heiner dr Trauba benda. Da mr abber von d´70er khert hen, dass se em letschda Johr 800 Marg an dr Heiner hen zahla missa, hot dr Baunty dr Heiner gfrogt, was denn dr Wei koschda soll. Do druf dr Heiner gsaid, dass´r en Schnoider Aldaber om 18 Marg do het.No hot dr Baunty gfrogt obber net en billigera hot. Do hot dr Heinrich verzehlt, dass´r blos no 18 Flascha Landwei om 12 Marg do hot, da mr abber an dem Obend 70ér hen aushalda missa wer des zwenig gwä. Drom hot dr Baunty frogt, ob dr Heinrich dr Aldaberg net a bissle billiger verkaufa ka. Dr. Lenza Heiner hot des wohl en dr falsche Hals kriagt ond zmol agfanga zom schreia: „Des gibt’s bei ons ned, bei ons wird ned kandelt, packet eira Trauba zamma ond verschwendet.“ Des hemmer ons nadierlich ned zwoimol saga lassa, hen onsre Trauba gschnabbt ond sen ganga. Dann semmer uf em Marktplatz gschdanda ond langsam sen au d´70er eidrudelt, dia hen onser Aktion au voll en Ordnung gfonda. Elle zamma hemmer dann iberlegt, wo mern benda kennat. Do hot dr Markus Lenz – er hot onsere Trauba durch d ´Gegend gfahra- dui Idee ket, dass mr onsern Trauba jo bei eane dohoim en dr Garasch benda kennat. Elle wared eiverschdanda, so hemmer osern Marakl zammapackt, ond sen zo Lenza hoim. Obwohl´s en Iberfall uf dr Opa war, isch trotzdem elles guat gloffa. Am Mittwoch, dr 10.10.1990, semmer dann zom Girlanda benda zom Gärtner Riale ganga – wo´s scho emmer gmacht wird. D´Mädla hen d´Tannazweig gloigschnibbelt ond em Riales Klaus zom benda nohglegt. En dr Zwischazeit hen d´Buaba dia Birka gschmigt ond an jedra Wirtschaft zwoi ufgschdellt. Sogar em Lenza Heiner hense zwoi nogschdellt, was der warscheinlich, alser se gsäh hot schier net hot glauba kenna.

 

Ond dann ischs erschd richtig losganga, es war nämlich dr 11.10.1990 Kirbedonnerschdich.

 

Om neine war Friaschdigstreffa em Cafe. Schbäder semmer dann end Grundschul nuff ond hen Lärm gmacht. Middagessa hädda mer dann eigentlich om Zwelfe beim Schäfer solla, abber do wars om dui Uhrzeit z´voll. Dromm semmer a bissle romgloffa. Zufällig hemmer dann den Scherzdrauba aus lauder Schwemmfliegele gsäh, den os d´70ér nuff ghengt hen. Dronder hen se a Schild ghengt uf des se: Uf das d´Kirbe ned ondergoht, gschrieba hen. Etwa om Ois henn dann dr Frank ond dr Stefan oser  90 Kilo schwera  UFO-TRAUBA an oser Girlande zwischa Krone ond Häfner ufghengt. Er isch von os elle Liabevoll Ufo-Traube gnennt worda- wega seira Form. Alser droba war hemmer os elle dronder nah gschdellt ond henns Kirbe-Liad gsonga. Donnoch semmer dann zom Middagessa zom Schäfer. (Sauerbroda, broide Nudla, Soß, Kardoffelsalat) Middags semmer dann durch oinige Beidelschbächer Wirdschafta zoga, henn gsonga ond os aushalda lassa. (z.B. beim Arma Konrad- Rot ond Weiswei) Weil mer ausgmacht hen, dass oser Trauba bis om fenfe Galgafrischd hot (des hoist, das en d´70er vorher ned glauad) Semmer so lang romzoga. Om Fenfe hennen osre Buaba no wieder abghengt ond mit em Buldog direkt zom Schäfer seim Kiahlhaus nondor gfahra. Zom Verschbra hemmer eigentlich en Lewa wella, abber weil do voll war semmer weidor ens Verschbor, dort war abbor au elles iberfillt, so semmer schliaßlich em Goispeter glandet. Am Freidich dr 12.10.1990 hemmer os dann om halb ois ufm Marktplatz droffa, weil mer zom Essa en Lewa hen wella. Noch dem guada Essa send dann die Dänzer en´d Schual nuff zom nommol broba. Des war dann dui erschd Brob mit dr Dagmar sie dui Gwetschkomod gschbild hot. Om halber Sechse war dann Treffa für elle em Anni, nochdem jeder ebbas gessa hot semmer langsam en´d Halle nauszoga. Als mer dort okhomma sen hot grad dr Gsangverei-dr Desjährige Ausrichter vom Fescht- a bar Liader gsonga . Donnoch hot dann dr OB a lange Ohsproch ghalda. Noch derra isch dr silberne Johrgang uf d´Behne gruafa worda. Do dorzu kherad: Waldemar Lust, Lore Ott, Wilfried Deeg, Ingrid Lenz, Ingrid Heid, Rainer Kuhnle, Rolf Werner, ond Harald Gutt. Dia henn dann vom OB a Medallia griagt. Ond weil mer osern OB noch mehrere Aläuf dorhoim Bsuacht hend, semmer als erschder grianer Johrgang au Namentlich uf´d Behne gruafa worda. Do hemmer dann jeder a Astecknodel griagt. Mir osrerseits henn em silberna Johrgang Greddla mit Bloama ond Trauba dren gschenkt. Nochdem dr silberne Johrgang dui Behne verlassa hot, hemmer ons fürs  Kirbeliad uffgschdellt. Des hot sich ganz fürchderlich akhert, weil jeder emma andra Ton gsonga hot. Donnoch henn dann osre Dänzer en Danz ufgfiert- den henn se von dr Andrea Hacker on dem Fred beibrocht griagt. Om neine hot no endlich dr Musikverei ogfanga zom spiela. Weil dr Frank am Samschdich dr 13.10.1990 Geburtsdag ghet hot, semmer en dera Nachd elle zu ihm. Als gschenkle ond firs Waga fahra hot er von os en Guatschei fir a naie Brill griagt, außerdem an Schbielzeigbulldog. An dem Obend hot au sei Muadder Ihr Gschenk fir´s Reg näha griagt, nämlich en großa Gschenkkorb vom Schäfer. Am Samschdich morga hemmer os dann om Zehne en dr Halle droffa, om oser Tombola ufzombaua. Wo se ufbaut war, hemmer so viel Gwenn ghet, das mer no meh los hen kaufa missa. Als mr do dormit ferdig warad semmer ufs Feschd beim Vollmer Platz ganga, Dort hot sich faschd jeder en Luftballo gholt ond an sei Rätsch nobonda. Mit derra Ausrüschdong hemmer os dann uf dr Weg zom Siaßmoschdmaier gmacht, wo os onser Fahrer- dr Bernd Goll- abgholt ond zom Paul Wilhelm gfahra hot. Dr PW hot os zwischa Wei ond Gsang verzehlt, das sich dr Kirbejohrgang jetzt scho seit 1945 emmer wieder bei ihm eifendet. Ond dort hemmer dann au endlich oser Kirbesau gfonda- Alexandra noch neun drongane „Schorle“ wie jeder Johrgang vor os henn au mir a Fläschle von oserm Johrgangswei probiera derfa. Noch ma riasagroßa ond guada Veschbor, des os dr PW no nogschdellt hot, semmer dann wieder nach Beidelschbach gfahra worda. An dem Obend hemmer wohl elle durch en „gloina“ Sitza khet. Kurz druf wara mr dann wieder en dr ibervillda Halle, wo scho a bombiga Schdimmung gherschd hot. Dui isch dann no gschdiaga als mir agfanga hen osere Los zom verkaufa- dia Leid hend se ons faschd aus de Hend grissa. Als dann dr Musikverei agfanga hot zom schbiela isch no besser worda. En dera Nacht semmer dann ens Cafe. Do hemmer gsonga, dronga, Gullaschsupp gessa ond Geld zählt. Noch ond noch send dann au a baar Musiker komma, ond gega schbäder au no dr 70ér- aber erschd nochdem se ebbes für os vorbereitet hen. Des hemmer abber erschd am Sonndich dr 14.10.1990 morgens om halb siebene agugga dirfa. Se hen ons en Trauba aus Lauder Rebleis ufghengt ond dr arme Konrad gschmiggt. Die meischde senn no hoim,  a baar senn no zom Ox zom friaschdiga etwa om elfe hemmer os dann wieder ufm Marktplatz droffa, do henn osre Buaba dann den Trauba abghengt ond bei dr Andra en dr Garage ufghengt. Dann henn se dui Schdang- an dui am Middag dr Trauba ghengt wird-nuffghengt. Dann hot d Generalprob vom Danz stattgfonda, aschliessend hot´s bei dr Andrea Middagessa gebba. (Broda, Kardoffelsalat, Schpätzla). Om Ois hen dann d´Buaba dr Trauba aus em Schäfer seim Kialhaus gholt. Mit dem hemmer ons dann vor em Lenz uffgschdelld. Dr Omzug isch dann vom Lenz aus ibert Rotsgass zom Marktplatz ganga. Ond weil mir dort mit so viel Gschroi ond viel Gerätsche einmaschiert sen hot mr em OB sei Aschproch net ganz verschdanda. Noch dera Aschproch hen dann d´Schualerkender en Danz Vorgführt ond Rebleis gsonga. Wia des elles ferdig war hot d´Conny onser Kirbegedicht uffgsagt.:

 

Von nah und fern; Grüß Gott ihr Leit!

S´herrscht Fröhligkeit und Kirbezeit.

Do isch mer luschdich ond schenkt ei

Vom alda ond vom nuia Wei!

 

Dui Kirbe, ja ihr liabe Leit,

des isch a Feschd aus alder Zeit.

Afangs, so han I´s gschriba gsäh,

Isch d´Kirchweih no em Frihling gwäh.

Ond au des, liabe leit, s´isch wohr:

Zor Weiles ka mer jetzt au versuacha

Vom nuia ond vom Kirbekuacha.

 

Ond mit deam Wechsel kam als Tugend

Zur Kirbe au Ihr Kirbejugend.

Von derra wird ganz ohscheniert,

zur Kirbezeit des Dorf regiert!

Em Kirbejohrgang isch was los:

Faif Däg lang kheiert der Flegga os!

Ganz Logisch ischs des sag i au:

A Bua sod au a Mädle hau.

 

Wia sod er sonsch zur Kirbe danza,

bis schbäd en´d Nacht em Felgga schwanza.

Ond do dorzua da Trauba draga:

Dr Vadder hot nex mei zom saga.

So ischd mer do au gern dorbei

Ond fife Dag luschdig, frehlich, frei.

 

Guggad doch dia Kerle a:

Ischs ed a Pracht grad Ma fir Ma!

Der Johrgang, Leit, isch hoch zu schätza:

Von ons Mädla ed zom schwätza!

Mir elle hend des sag i keck,

S´Herz en dr Bruschd am rechda Fleck.

S´isch rondrom klar, ha heidenei

So missad Beidelschbächer sei!

 

Doch jetzt, auf Buaba,  d´Loidor nuff

Ond hängad eiern Trauba uf!

Der soll zom Erndedank eich Griaßa

Zor Weiles ond zom Böller schiaßa.

Er verkendats elle weit ond broid:

Sengad, Danzad, hend a fraid;

Komm schonkled mit ons liabe Leit

Denn en Beidelschbach isch Kirbezeit!

 

Dann wared dr Jo ond dr Jörg an dr Roih osern Drauba nuff zomhänga, abber ned blos dia henn woiche Gnia khet. Elle wara mer froh alls´r droba war. Nochem Rätscha ond Böller schiaßa hemmer dann zom Senga nuff uf d´Behne missa. A Sengerei ka mer des ned nenna, weil eigentlich elle akratzde Schdemmbender khet hen ond koiner meh recht senga hot kenna. Als mer des hender ons brocht hen, semmer elle bis uf d´Dänzer von dr Behne ronder dia hen dann zwoi subber Dänz vorgfiert. Dann hen se au Behne verlassa. D´Frau Gabler hot dann vier von os ond vier von de silberne zom Kirbespiel uf d´Behne gruafa. Die Zwoi Mannschafta hen dann jeweils en Drauba mit sand ond Pflaschderschdoi auspflaschdra missa obwohl oser Drauba scheener ausgsäh hot, henn wia emmer d´silberne gwonna. Donoch ischs dann emma langa zug en d´halle nausganga. Dort war an dem Obend ned so viel los, weil dr Beidelschbächer Musikverei ned gschbielt hot. Dofier henn dann andere gschbielt. Nämlich dr Enderschbächer Musikverei, dr Schnoidr Musikverei ond dr Schdrempfelbächer Musikverei. An dem Obend semmer dann faschd elle belder hoim komma. Am Medich dr 15.10.1990 hemmer ons dann middags droffa om einige Grubbabilder zom macha. Dornoch semmer en d´halle nei, wo Aldanochmiddag war. Obwohl mer´s ned eiplant khet hend hemmer nommol onser Kirbeliad senga missa. Deshol hot sichs ned so schregglich aghert, aber blos weil no jemand nit dr Quetschkomod dorzua gschbielt hot. Am Obend isch´s dann nommol hoch herganga- s´war jo au schließlich dr letzschde obend. Ond weil mir jo schliaßlich dr LRZV (läschdernde, revolutionäre, zickige Verei) sen, hemmer osern Drauba ned wia die Kirbejohrgäng vor os versteigert, sondern mir hen en verlost. Dobei hemmer viel meh eignomma, außerdem hot´s em Musikverei gfalla, weils ned so lang dauert hot ond so dia Schdemmung ned weg war. Glick khet hemmer au no, weil dui Frau, die en gwonna hot, hot en ned wella; so hemmer osern Drauba no fir a Kischd Wai ausglöst ond am Mittwoch dr 17.10.1990 beim Frieder en dr Schuier presst. An dr Kirbe 1991 hemmern no dronga- er hot ganz supper gschmeckt. En derra Nacht semmer no zu dr Sandra, wo au scho d 70ér warad- a baar vom Musikverei send au no komma. Am Daischdich morga dr 16.10.1990 semmer no om kurz vor siebene bei dr Sandra ganga aber om neine hemmer ons dann scho wieder em veschbor droffa. Es sen aber blos a baar hartnägige do gwäh.: Joachim, Stefan, Birgit, Conny, Jo, Frank, Petra, Ute, Andrea W. Frieder, Thea, Pit, Frosch und Hasso- ned ammol dr Klaus war do. Do semmer dann no a Weile zamma gsässa, hen en Wai dronga ond a bissle gschwätzt.